परशुराम-जयन्ती

अवतारदिने पुण्ये हरिमुद्दिश्य भक्तितः।
उपवासादि यत् किञ्चित्तदानन्त्याय कल्पते॥
—स्मृतिमुक्ताफलम्
लक्ष्मीनारायणसंहिता/खण्डः १ (कृतयुगसन्तानः)/अध्यायः २६८---
वैशाखस्य सिते पक्षे तृतीयायां पुनर्वसौ।
जमदग्निगृहे प्रादुरासीत्परशुधृक् हरिः॥२२॥
व्रतराजे—
इयमेव तृतीया परशुरामजयन्ती॥ सा च प्रदोषव्यापिनी ग्राह्या।
तदुक्तं भार्गवार्चनदीपिकायां स्कन्दभविष्ययोः—
वैशाखस्य सिते पक्षे तृतीयायां पुनर्वसौ।
निशायाः प्रथमे यामे रामाख्यः समये हरिः।
स्वोच्चगैः षड्ग्रहैर्युक्ते मिथुने राहुसंस्थिते॥
रेणुकायास्तु यो गर्भादवतीर्णो विभुः स्वयम्।
दिनद्वये तद्व्याप्तावंशतः समव्याप्तौ च परा॥ अन्यथा पूर्वैव।