जीवपुत्रिकाष्टमी/जीमूतवाहन-पूजा

जीवत्पुत्रिकाऽष्टमी—
{[पूर्णिमान्त]}आश्विनकृष्णाष्टमी जीवत्पुत्रिकाख्या। तथा हि भविष्ये—
इषे मास्यसिते पक्षे चाष्टमी या तिथिर्भवेत्।
पुत्रसौभाग्यदा स्त्रीणां ख्याता सा जीवपुत्रिका॥
शालिवाहनराजस्य पुत्रो जीमूतवाहनः।
तस्यां पूज्यः स नारीभिः पुत्रसौभाग्यलिप्सया॥
इयमष्टमी प्रदोषव्यापिन्युपोष्या।
प्रदोषसमये स्त्रीभिः पूज्यो जीमूतवाहनः।
पुष्करिणीं विधायाथ प्राङ्गणे चतुरस्रिकाम्॥
इति भविष्यपुराणात्।
यद्युभयदिने प्रदोषव्याप्तिः तदाऽपरेऽहन्येव प्रधानकालानुरोधात्, नवम्यधिकरणकपारणानुरोधाच्च
पूर्वदिने व्रते तु वक्ष्यमाणवचनेन अष्टम्यां पारणे दोषश्रवणेन तदन्ते निशिपारणनिषेधेन च उपवासद्वयापत्तिः।
यदि पूर्वेयुः प्रदोषव्याप्तिर्न परेद्युरिति तदा पूर्वेयुरेव प्रदोषानुरोधबोधकपूर्वोक्तवचनात्।
पूर्वेद्युरपरेद्युर्वा प्रदोषे यत्र चाष्टमी।
तत्र पूज्यः सदा स्त्रीभी राजा जीमूतवाहनः॥
इति विष्णुधर्मोत्तरीयाच्च।
—कृत्यसारसमुच्चयः