दशहरा/गङ्गावतरणम्/दशपापहरा-दशमी

दशम्यां शुक्लपक्षे तु ज्येष्ठे मासे कुजे दिने।
गङ्गाऽवतीर्णा हस्तर्क्षे सर्वपापहरा स्मृता॥
यां काञ्चित् सरितं प्राप्य दद्यादर्घ्यं शुभोदकम्।
मुच्यते दशभिः पापैः स महापातकोपमैः॥
कृत्यसारसमुच्चये—
एतद्दशमीमभिधाय स्कान्दे—
यां काश्चित्सरितं प्राप्य दद्यादर्घ्यतिलोदकम्।
मुच्यते दशभिः पापैः स महापातकोपमैः॥
दशपापान्याह राजमार्तण्डे—
पारुष्यमनृतं चैव पैशुन्यं चापि सर्वतः।
असम्बद्धप्रलापं च वाङ्मयं स्याच्चतुर्विधम्॥
अदत्तानामुपादानं हिंसा चैवाविधानतः।
परदारोपसेवा च कायिकं त्रिविधं मतम्॥
परद्रव्येष्वभिध्यानं मनसाऽनिष्टचिन्तनम्।
वितथाभिनिवेशश्च मानसं त्रिाविधं स्मृतम्॥
अस्यां गङ्गास्नाने सङ्कल्पः ॐ अद्येत्यादि दशविधपापक्षयकाले गङ्गायां स्नानमहं करिष्ये इति।
[पुरुषार्थचिन्तामणिः पृ १४५] ज्येष्ठे मले तत्रैवेदं कर्तव्यम्—
दशहरासु नोत्कर्षश्चतुर्ष्वपि युगादिषु।
उपाकर्म महापष्ठयोर्ह्येतदिष्टं वृषादितः॥
इति हेमाद्रौ ऋष्यशृङ्गवचनात्।