अनध्यायः

लिखितः—
छिद्राण्येतानि विप्राणां येऽनध्यायाः प्रकीर्तिताः।
छिद्रेभ्यः स्रवति ब्रह्म ब्राह्मणेन यदार्जितम्।
तत्काले तस्य रक्षांसि श्रियं ब्रह्म यशो बलम्।
सर्वमादाय गच्छन्ति वर्जयन्ति च तत्फलमिति॥
स्मृत्यन्तरे—
अनध्यायेष्वधीयीत द्विजः स्तैन्यं करोति यः॥
अनध्यायेष्वध्ययने प्रज्ञामायुः श्रियं तथा।
ब्रह्म वीर्यं च तेजश्च निकृन्तति यमः स्वयम्॥
ब्रह्मवीर्यक्षयभयादिन्द्रो वज्रेण हन्ति च।
ब्रह्मराक्षसता चान्ते नरकञ्च भवेद्ध्रुवम्॥
अत्र गाथा यमोद्गीताः कीर्तयन्ति पुराविदः।
आयुरस्य निकृन्तामि प्रज्ञामस्याददेऽथ वा॥
य उच्छिष्टः प्रवदति स्वाध्यायं वाऽधिगच्छति।
यश्चानध्यायकालेऽपि मोहादभ्यसति द्विजः।
तस्माद्युक्तोऽप्यनध्याये नाधीयीत कदाचनेति॥